EWE MVIVU, UTALALA MPAKA LINI?

Ewe Mvivu ,Utalala mpaka Lini?

“Mikono mivivu hufanya mtu maskini lakini   mikono yenye bidii huleta utajiri- Mfalme Sulemani”

Mithali 6:9-10 

Ewe mvivu, utalala hata lini? utaamka lini kutoka katika usingizi wako? Bado kulala kidogo, kusinzia kidogo, bado kukunja mikono upate usingizi!Hivyo umaskini wako huja kama mnyang’anyi na uhitaji wako kama mtu mwenye silaha.

Kitabu cha Mithali ndicho ambacho kimezungumza sana juu ya uvivu kuliko kitabu kingine chochote katika Biblia, kimetumia kwa wastani wa mistari 32 kuelezea namna ambavyo uvivu  haufai. Kitabu cha Mithali kina mahusia mengi  ya maisha hasa kwa vijana. Kitabu hiki kinazungumzia mithali za hekima, kuwafundisha watu jinsi ya kuishi maisha yanayompendeza Mungu. Mfalme Sulemani  ana uona uvivu ni kama moja ya hatari inayo wakabili watu wengi hasa vijana.

Katika Fizikia kuna sheria ya kwanza ya mwenendo iliyovumbuliwa na Mwanasayansi aitwaje Isaack Newton,Sheria hii ya mwenendo inasema  kwamba ikiwa kitu kipo katika mwenendo huelekea kubaki katika mwendo,na ikiwa kitu kipo katika  mapumziko huendelea kubaki katika mapumziko.Sheria hii inatumika kwa watu pia.

Katika maisha ya kila siku kuna  baadhi ya watu wanasukumwa kwa kawaida kuendea kufanya kazi au shughuli na kukamilisha miradi fulani,na wengine ni watu wanao wanahitaji motisha ili kuondoka  na kwenda kufanya kitu,vinginevyo watabakia hapo hapo bila kufanya kitu chochote cha kuzalisha.Hili kundi la pili ndilo la watu wanaitwa wavivu

UVIVU NI NINI?

• Uvivu ni mlango wa  dhambi nyingine kupata nafasi kuingia katika maisha ya mtu.
• Uvivu ni shauku ya kuwa bure bila kazi  au shughuli yeyote.Ni Kutulia tu.
• Uvivu ni kuwa mlegevu na mzembe katika kufanya mambo.
• Uvivu ni ile hali ya kutofanya chochote na kutofanya juhudi zozote za kufanya kitu.
• Uvivu ni hali ya kukaa tu na kuacha mambo yakae na kubakia kama yaliyo.
•  Uvivu si chochote zaidi ya tabia ya kumpumzi kabla hatujachoka - Jules Renard
•  Mtu ambaye hamalizi majukumu yake kwa wakati ni mvivu.
•  Mtu ambaye haonekani kwenye kazi yake kwa muda wa kazi huyo ni mvivu.
•  Mtu ambaye anakwepa majukumu yake ya kazi huyo ni mvivu.
•  Mtu ambaye hawezi kuanza na kuendeleza jambo fulani lililo katika uwezo wake ni mvivu.
• Uvivu ni uhairishaji wa shughuli ambao hauwezi kuutawala tena.

ONYO KWA WAVIVU WOTE.

Mtume Paulo naye  alikemea kwa nguvu juu ya uvivu miongoni mwa waamini katika  Kanisa la Wathesalonike.Na yeye mwenyewe alikuwa ni mfano kwao wa kufanya kazi kwa bidii.

2 WATHESALONIKE 3:6-9

Ndugu, tunawaagiza katika Jina la Bwana Yesu Kristo, jitengeni na kila ndugu ambaye ni mvivu na ambaye haishi kufuatana na maagizo tuliyowapa. Maana ninyi wenyewe mnajua jinsi iwapasavyo kufuata mfano wetu.

 Sisi hatukuwa wavivu tulipokuwa pamoja nanyi, wala hatukula chakula cha mtu ye yote pasipo kukilipia. Badala yake tulifanya kazi kwa bidii usiku na mchana, ili tusimlemee mtu ye yote miongoni mwenu.

Tulifanya hivi, si kwa sababu hatukuwa na haki ya kupata msaada kama huo, lakini ili kusudi tujifanye sisi wenyewe kuwa kielelezo.” Kwa maana hata tulipokuwa pamoja nanyi, tuliwapa amri ili kwamba: ‘‘Mtu ye yote asiyetaka kufanya kazi, wala asile.’’

1 WATHESALONIKE 4:11-12

Jitahidini kuishi maisha ya utulivu, kila mtu akijishughulisha na mambo yake mwenyewe na kufanya kazi kwa mikono yake, kama vile tulivyowaagiza, ili maisha yenu ya kila siku yajipatie heshima kutoka kwa watu walio nje, ili msimtegemee mtu ye yote

AINA NNE (4) ZA UVIVU   ZILIZOFICHIKA

Kwa kawaida huwa tunachukulia uvivu kwa vile vitu ambavyo ni rahisi kuonekana.Kwa uelewa huu wa uvivu umetufanya tuamini kama tunaonekana kwenye kazi zetu na kuzimaliza basi sisi sio wavivu. Kitu ambacho sio kweli.Kuna aina nyingine nyingi za uvivu ambazo huenda unazitumia kila siku na zinaendelea kukurudisha nyuma. Huwezi kufikia mafanikio makubwa kama utaendelea na hizi aina nyingine nyingi za uvivu. Hebu angalia aina hizi ya uvivu.

 Uvivu wa kutoyafanya yale uliyoyapanga kufanya.

Kitendo cha kupanga wewe mwenyewe kwenye nafsi yako kwamba utafanya kitu halafu usifanye ni uvivu. Kwa sababu kwa akili zako timamu ulikubali kwamba kuna kitu utafanya au kubadili kwenye maisha yako, sasa mbona hufanyi kitu hicho?

Ulisema utawahi kuamka,  mbona hufanyi hivyo? Ulisema utaanza kuweka akiba, mbona hufanyi hivyo? Ulisema utaacha kupoteza muda mbona hufanyi hivyo? na mambo mengi kama hayo. Huo pia ni uvivu uliojificha.

 Uvivu wa kutofikiri juu ya maisha yako mwenyewe.

Moja ya uvivu uliojificha ni uvivu wa kufikiri.Watu wengi ni wavivu katika eneo hili.Eneo hili  lina wavivu wengi sana,watu wengi ni wavivu kufikiri ni nini wafanye,wako radhi kufanya mambo mengine yote lakini siyo kufikiri.Kufikiri ni kazi ngumu sana kwa watu wavivu.

Kusubiri watu wafikirie kwa niaba yako kwamba uishi vipi nao ni uvivu mkubwa sana. Kama huna mipango na maisha yako na unafanya kile ambacho kila mtu anafanya, basi wewe ni mvivu. Hakuna kundi jingine tunaloweza kukuweka. Kwa nini usikae chini na kuamua ni maisha gani unayotaka kuishi wewe, kwa nini utake tu kwenda kama hujui unakoelekea?

Uvivu wa  kutofanya mambo kwasababu ya  kuogopa na kutokuwa na uhakika.

Kuogopa kufanya jambo kwa sababu huna uhakika au ni jambo jipya nao ni aina ya uvivu uliojificha.Ndio, uvivu unakufanya uone ni kitu ambacho hakiwezekani kufanyika. Kama ukiondokana na uvivu na kuweza kufanya huenda ukaleta mabadiliko makubwa sana.

Uvivu wa kuahirisha mambo ambayo ulipaswa kuyafanya.

Kuahirisha mambo nao ni uvivu tena mkubwa sana. Yaani kwa nini upange mwenyewe kwamba muda fulani utafanya kitu fulani, halafu wewe mwenyewe useme hutafanya tena, tena bila sababu ya msingi? Huu nao ni uvivu uliojificha.

 Uvivu wa kukwepa kufuta njia ndefu ya kufikia kwenye mafanikio.

Kutafuta njia ya mkato hasa kwenye kufikia mafanikio nao ni uvivu mkubwa sana. Na mara zote unaposhawishika kupita tu njia ya mkato ili upate mafanikio ni lazima upotee.